काठमाडौं – आज देशैभरी ३४०३ जना नयाँ कोरोना संक्रमित थपिएका छन् ।
स्वास्थ्य तथा जनसंख्या मन्त्रालयका अनुसार ११ हजार ८३९ पिसीआर र ४,९९९ एन्टिजेन गरी दुवै विधिबाट गरिएको १६ हजार ८३८ नमुना परीक्षणमा ३४०३ जनामा कोरोना भाइरस संक्रमण पुष्टि भएको हो । मन्त्रालयको विवरण अनुसार मंगलवारको तुलनामा बुधवार संक्रमित हुनेको संख्या केही बढेको हो ।
आज काठमाडौंमा ७११, ललितपुरमा १६० र भक्तपुरमा १२२ जना गरी उपत्यकामा आज ९९३ जना नयाँ संक्रमित थपिएका छन् ।
त्यसैगरी पछिल्लो २४ घण्टामा २१०४ जना कोरोना संक्रमणबाट मुक्त भएका छन् । योसँगै नेपालमा कोरोना संक्रमणबाट निको हुनेको संख्या ६ लाख ८९ हजार १७३ पुगेको छ ।
त्यस्तै आज देशैभरी थप ४२ जना कोरोना संक्रमितको मृत्यु भएको छ । आज थपिएका ४२ जनासँगै नेपालमा कोरोना संक्रमणबाट मृत्यु हुनेको संख्या १० हजार ३९६ पुगेको छ । मंगलवारको तुलनामा आज मृत्यु हुनेको संख्या पनि बढेको छ ।
हाल देशैभरी सक्रिय संक्रमितको संख्या ४० हजार ३३८ रहेको स्वास्थ्य मन्त्रालयले जनाएको छ । ती मध्ये ३६ हजार ८०६ जना होम आइसोलेशन र ३,५३२ जना संस्थागत आइसोलेशनमा उपचारत छन् ।
मन्त्रालयका अनुसार हाल देशैभरीका आइसीयुमा ७७० जना र भेन्टिलेटरमा १८६ जनाको उपचार भइरहेको छ । मंगलवारको तुलनामा भेन्टिलेटर र आइसीयुमा उपचार गराउनेको संख्या कम भएको छ ।
त्यस्तै बुधवार देशैभरी ८४ लाख १३३ जनाले कोरोना भाइरसविरुद्धको खोप लगाइएको पनि मन्त्रालयले जानकारी दिएको छ ।
नेपालमा हालसम्म दुवै विधिबाट गरिएको कूल ४१ लाख ७५ हजार २७७ नमुना परीक्षणमा हालसम्म संक्रमित हुनेको संख्या ८ लाख ११ हजार २८७ पुगेको छ ।
