जनकपुरधाम । मधेस प्रदेशका मुख्यमन्त्री कृष्णप्रसाद यादवले पदबाट राजीनामाको घोषणा गरेका छन्। शनिबार प्रदेशसभाको विशेष बैठकलाई सम्बोधन गर्दै मुख्यमन्त्री यादवले राजनीतिक स्थिरता र नयाँ सरकार गठनका लागि बाटो खुला गर्दै राजीनामा दिएको बताएका हुन्। उनको सम्बोधनसँगै मधेस प्रदेशको राजनीतिक समीकरणमा नयाँ मोड आएको छ।
प्रदेशसभा बैठकलाई भावुक सम्बोधन गर्दै मुख्यमन्त्री यादवले बहुमत र अंकगणितको अनिर्णित खेलमा प्रदेशलाई बन्धक बनाउनु उचित नहुने धारणा राखे। प्रदेशको समग्र विकास, राजनीतिक निकास र जनताप्रतिको जिम्मेवारीलाई प्राथमिकतामा राखेर आफूले स्वेच्छाले मार्गप्रशस्त गरेको उनको दाबी थियो।
मधेस प्रदेशमा पछिल्लो राजनीतिक समीकरणअनुसार नयाँ सरकार गठनका लागि दलहरूबिच सत्ता सहकार्यको सहमति यसअघि नै जुटिसकेको छ। मुख्यमन्त्रीको राजीनामापछि अब प्रदेश प्रमुखले संविधानको धाराअनुसार नयाँ सरकार गठनका लागि आह्वान गर्नेछन्। सोहीअनुसार बहुमत सदस्यहरूको समर्थनसहित नयाँ मुख्यमन्त्रीका लागि दाबी पेस गर्ने दलहरूको तयारी छ।
यादवको यस निर्णयलाई प्रदेशको राजनीतिक निकासका रूपमा हेरिएको छ। प्रदेशसभामा प्रतिनिधित्व गर्ने दलहरूले अब चाँडै सहमतिको आधारमा नयाँ मन्त्रिपरिषद् गठन गरी रोकिएका विकास निर्माण र बजेट कार्यान्वयनका कामहरूलाई तीव्रता दिने बताएका छन्।
