काठमाडौं, चैत २६ – प्रधानमन्त्री केपी शर्मा ओलीले लोकतन्त्र जनताको जीवनशैलीमा अनुभूत हुनुपर्नेमा जोड दिएका छन्। मंगलबार मधेस प्रदेशसभामा विशेष सम्बोधन गर्दै उनले राजनीतिक परिवर्तन जनताबाटै सम्भव भएको सन्देशलाई कहिल्यै नबिर्सिन आग्रह गरे।
“जनताको जीवनमा लोकतन्त्र आउनुपर्छ। सामाजिक सबै पक्षमा लोकतन्त्र फुल्नुपर्छ, फल्नुपर्छ। अनि मात्रै लोकतन्त्र अघि बढ्छ,” प्रधानमन्त्री ओलीले भने।
उनले राजनीतिक अधिकारको मात्र सीमितता नहुने उल्लेख गर्दै परिपूर्ण लोकतन्त्रको लागि सबै क्षेत्रमा समान प्रभाव पर्नुपर्ने बताए। “राजनीतिमा मात्र लोकतन्त्र भए पनि, त्यो गरिब जनतालाई सरोकार नहुन सक्छ,” उनले स्पष्ट पारे।
प्रधानमन्त्री ओलीले गरिबी निवारण र जनताको आधारभूत आवश्यकता सुनिश्चित गर्न नसकिए लोकतान्त्रिक प्रणालीमाथि जनताले प्रश्न उठाउने चेतावनी पनि दिए। “यदि प्रणालीले जनतालाई सहज जीवन दिन सकेन भने जनताले प्रणाली नै खारेज गर्न सक्ने स्थिति आउन सक्छ,” उनले भने।
उनले विकासको आधार सुशासन भएको भन्दै सबै तहमा जिम्मेवार र पारदर्शी शासन प्रणालीको आवश्यकता औंल्याए।

