काठमाडौं । प्रधानमन्त्री केपी शर्मा ओली आज (मंगलबार) थाइल्याण्डको औपचारिक भ्रमण तथा बिमस्टेक शिखर सम्मेलनमा सहभागी हुन बैंककतर्फ प्रस्थान गर्दैछन्। उनले दिउँसो १ बजे यात्रा सुरु गर्नेछन्।
प्रतिनिधि सभाको हिजोको बैठकमा सम्बोधन गर्दै प्रधानमन्त्री ओलीले नेपाल-थाइल्याण्ड कूटनीतिक सम्बन्ध स्थापनाको ६५ वर्षपछि पहिलो पटक नेपाली प्रधानमन्त्रीको औपचारिक भ्रमण हुन लागेको जानकारी गराएका थिए। बैंककलाई ‘गेट–वे’ शहरका रूपमा उल्लेख गर्दै उनले यो भ्रमण विशेष महत्त्वको रहेको बताए।
भ्रमणका क्रममा प्रधानमन्त्री ओलीले थाइल्याण्डका नरेश तथा समकक्षीसँग भेटवार्ता गर्नेछन्। पर्यटन तथा संस्कृतिसम्बन्धी दुई समझदारीपत्रमा हस्ताक्षर हुनेछ भने गैरसरकारी क्षेत्रबीच पनि ६ सम्झौताहरू गरिनेछन्। साथै, थाइल्याण्डका प्रतिष्ठित व्यवसायीहरूसँग छलफल गर्नुका साथै एशियन इन्स्टिच्युट अफ टेक्नोलोजीमा सम्बोधन गर्ने कार्यक्रम छ।
प्रधानमन्त्री ओलीले चैत २२ गते बिमस्टेक शिखर सम्मेलनलाई सम्बोधन गर्नेछन्। साथै, अन्य सहभागी मुलुकका नेताहरूसँग साइडलाइन वार्ता गर्ने सम्भावना रहेको छ।
4o
