एनपीएलमा आज पहिलो क्वालिफायर : फाइनलको टिकटका लागि लुम्बिनी र सुदूरपश्चिम आमनेसामने

काठमाडौँ । जारी दोस्रो संस्करणको नेपाल प्रिमियर लिग (एनपीएल) क्रिकेटको उपाधि होड अन्तिम चरणतर्फ मोडिएको छ, जहाँ आज मंगलबार पहिलो क्वालिफायर खेलमा शीर्ष स्थानको लुम्बिनी लायन्स र दोस्रो स्थानको सुदूरपश्चिम रोयल्स आमनेसामने हुँदैछन्। कीर्तिपुरस्थित त्रिवि क्रिकेट मैदानमा साँझ ५ बजे सुरु हुने यस खेल जित्ने टोली सोझै फाइनलमा पुग्ने भएकाले दुवै टोली जित निकाल्ने दृढ लक्ष्यसहित मैदानमा उत्रिँदैछन्।

प्रतियोगिताभर सन्तुलित र आक्रामक क्रिकेट खेलेको लुम्बिनी लायन्स लिग चरणका ७ खेलमध्ये ५ खेलमा जित निकाल्दै ११ अंकसहित तालिकाको पहिलो स्थानमा रहन सफल भएको थियो। लुम्बिनीको ब्याटिङमा डि’आर्सी सर्ट, कप्तान रोहित पौडेल तथा निरोशन डिकवेलाले दरिलो योगदान दिइरहेका छन् भने बलिङमा शेर मल्ल, किशोर महतो र रुबेन ट्रम्पलम्यानले विपक्षी ब्याटरहरूलाई बाँधेर राखेका छन्। साविक विजेता लुम्बिनी लगातार दोस्रो पटक उपाधि चुम्ने अभियानमा दृढ देखिएको छ।

यता सुरुवाती पराजयलाई बिर्साउँदै लगातार चार खेल जितेर उत्कृष्ट पुनरागमन गरेको सुदूरपश्चिम रोयल्स ७ खेलबाट १० अंक जोडेर दोस्रो स्थानमा उभिएको छ। कप्तान दीपेन्द्रसिंह ऐरीको चतुर कप्तानीमा सुदूरपश्चिमका बलरहरूले कसिलो प्रदर्शन गरिरहेका छन् भने विदेशी खेलाडी सैफ जेब र ब्रान्डन म्याकमलेनको ब्याटिङ पनि मजबुत छ। लिग चरणको पहिलो भेटमा लुम्बिनीसँग बेहोरेको हारको बदला लिँदै सिधै फाइनलको यात्रा तय गर्ने सुदूरपश्चिमको दाउ छ।

पहिलो क्वालिफायरमा पराजित हुने टोली प्रतियोगिताबाट बाहिरिने छैन, उसले एलिमिनेटर खेलको विजेतासँग दोस्रो क्वालिफायर खेल्ने मौका पाउनेछ। यद्यपि, दुवै टोली कुनै जोखिम नलिई आजै जित निकाल्दै फाइनलको स्थान सुरक्षित गर्ने रणनीतिमा छन्। कीर्तिपुरको मैदानमा आज साँझ हजारौँ क्रिकेट समर्थकहरूको बाक्लो उपस्थितिबिच हुने यस महाभिडन्तले क्रिकेटप्रेमीहरूलाई रोमाञ्चक क्षण दिने विश्वास गरिएको छ।

यो समाचार सेयर गर्नुहोस्:

LEAVE A REPLY

Please enter your comment!
Please enter your name here

थप समाचार

ताजा