भिमफेदी दुर्घटनाका पीडित परिवारलाई राहत र बालबालिकाको शिक्षाको जिम्मा सरकारले लिन्छ : सभामुख अर्याल

काठमाडौँ । मकवानपुरको भिमफेदीमा भएको यात्रुवाहक भ्यान दुर्घटनाका मृतकका आश्रित परिवारलाई सरकारले कानुनी प्रक्रिया मिलाएर आवश्यक राहत उपलब्ध गराउने भएको छ। सर्लाहीको चक्रघट्ट गाउँपालिका-४ सुन्दरपुर पुगेर शोकसन्तप्त परिवारजनलाई समवेदना व्यक्त गर्दै सभामुख डोलप्रसाद अर्यालले पीडित बालबालिकाको उच्च शिक्षा तथा पालनपोषणको व्यवस्था मिलाउन सरकारले पहल थाल्ने बताएका हुन्।

स्थानीय बासिन्दा र पीडितहरूसँग कुराकानी गर्दै सभामुख अर्यालले स्थानीय, प्रदेश र संघीय सरकारसँग छलफल गरी उचित राहत प्याकेजको प्रबन्ध गरिने जानकारी दिए। मौजुदा कानुनले समेट्न नसकेका विषयमा पनि मन्त्रिपरिषद् वा अन्य सम्बन्धित निकायबाट विशेष निर्णय गराएर भए पनि पीडितलाई न्याय दिलाइने उनको दृढ प्रतिबद्धता थियो। घरको मुख्य कमाउने सदस्य गुमाएका परिवारलाई आर्थिक संकटबाट जोगाउन राज्यले ठोस साथ दिने उनले स्पष्ट पारे।

गत बिहीबार काठमाडौँबाट छठ मनाउन घर फर्किने क्रममा भिमफेदी-६ चिसापानी गढीमा भएको उक्त दुर्घटनामा सुन्दरपुरका १३ जनाको ज्यान गएको थियो। दुर्घटनामा परेर घाइते भएका ६ जनामध्ये केहीको अझै अस्पतालमा उपचार भइरहेको छ। चक्रघट्ट गाउँपालिकाले मृतकका परिवारलाई तत्काल क्रियाखर्चबापत जनही ५० हजार रुपैयाँ सहयोग उपलब्ध गराइसकेको छ।

पीडित परिवारलाई ढाडस दिन सभामुख अर्यालसहित सर्लाहीका प्रत्यक्ष निर्वाचित सांसदहरू र जिल्ला प्रशासनका प्रमुख अधिकारीहरू गाउँमै पुगेका थिए। भेटका क्रममा पीडितहरूले आफूहरूको बिचल्ली हुन नदिन र भविष्यको सुनिश्चितताका लागि प्रभावकारी कदम चाल्न आग्रह गरेका थिए। प्रतिनिधिमण्डलले सडक सुरक्षालाई कडा बनाउन र यस्ता दुर्घटना दोहोरिन नदिन दीर्घकालीन नीति ल्याउनुपर्ने आवश्यकता औँल्याएको छ।

यो समाचार सेयर गर्नुहोस्:

LEAVE A REPLY

Please enter your comment!
Please enter your name here

थप समाचार

ताजा