काठमाडौँ । चिनियाँ कम्युनिस्ट पार्टी (सीपीसी) को निमन्त्रणामा चीन भ्रमणको पूर्वतयारीमा रहेको राष्ट्रिय स्वतन्त्र पार्टी (रास्वपा) को प्रतिनिधिमण्डलले आज पार्टी सभापति रवि लामिछानेसँग परामर्श तथा भेटवार्ता गरेको छ। पार्टी केन्द्रीय कार्यालयमा भएको छलफलमा भ्रमणका मुख्य उद्देश्य, कार्यसूची तथा कूटनीतिक प्राथमिकताबारे सभापति लामिछानेले टोलीलाई आवश्यक दिशानिर्देश गर्नुभएको छ।
रास्वपाका महामन्त्री विपिन कुमार आचार्यको नेतृत्वमा जाने उक्त उच्चस्तरीय प्रतिनिधिमण्डल २०८३ कार्तिक २९ गते चीनतर्फ प्रस्थान गर्ने कार्यक्रम तय भएको छ। भ्रमणका क्रममा टोलीले चिनियाँ कम्युनिस्ट पार्टीका शीर्ष नेताहरूसँग भेटघाट गर्नुका साथै चीनको आधुनिक विकास मोडल, प्रविधि र सुशासनको अभ्यासको अवलोकन गर्ने बताइएको छ।
यसअघि भ्रमण टोलीले शुक्रबार प्रधानमन्त्री बालेन शाहसँग भेटवार्ता गरी द्विपक्षीय हित र कूटनीतिक समन्वयबारे महत्त्वपूर्ण छलफल गरेको थियो। प्रधानमन्त्री शाहसँगको भेटमा नेपालको पूर्वाधार विकास, पर्यटन प्रवर्द्धन र उत्तरी छिमेकीसँगको व्यापारिक सहजीकरणका मुद्दाहरूमा गहन कुराकानी भएको थियो।
भेटका क्रममा सभापति लामिछानेले नेपालको असंलग्न परराष्ट्र नीति र राष्ट्रिय स्वार्थलाई केन्द्रमा राखेर दुई देशबिचको आपसी भाइचारा र सहकार्यलाई नयाँ उचाइमा पुर्याउन टोलीलाई आग्रह गर्नुभयो। रास्वपाले छिमेकी मित्रराष्ट्रहरूसँग विश्वासिलो र प्रगाढ सम्बन्ध निर्माण गर्न चाहेको उल्लेख गर्दै यो भ्रमण पार्टी र देश दुवैका लागि उपलब्धिमूलक हुने नेताहरूले बताएका छन्।
