कोरोनाको ‘हट स्पट’ बन्दै काठमाडौँ

काठमाडौँ– आज मंगलबार, १३ असोज, सम्म काठमाडौँ जिल्लामा कोरोना संक्रमितको संख्या १८ हजार १३० पुगेको छ ।

देशभर हालसम्म सबैभन्दा बढी संक्रमितहरू भएको जिल्ला काठमाडौँ बनेको छ जहाँ कोभिड संक्रमित ८ हजार ४६५ जना उपचाररत अवस्थामा रहेका र ९ हजार ५७३ जना डिस्चार्ज भइसकेका छन् ।

हालसम्म काठमाडौँमा मात्र ९२ जना कोरोना संक्रमितहरूको मृत्यु भएको छ । कोरोना भाइरसको संक्रमण रोकथामका लागि काठमाडौँ जिल्लाका नगरपालिकाहरू आफ्नै ढङ्गले सक्रिय छन् ।

काठमाडौं महानगरसहित तारकेश्वर, टोखा, बुढानीलकण्ठ, गोकर्णेश्वर, कागेश्वरी मनोहरा, शंखरापुर, कीर्तिपुर, चन्द्रगिरि र दक्षिणकाली गरी दशवटा नगरपालिका छन् । कोभिड-१९ संक्रमितको संख्या काठमाडौँ महानगरभित्रै बढी छ ।

नगरपालिकाहरूले कोभिड संक्रमण न्युनीकरणका लागि विभिन्न कदमहरू चालेको बताएका छन् । हाल कोभिडको हटस्पटका रुपमा देखिएको काठमाडौं जिल्लाका १० नगरपालिकाहरूले भाइरस संक्रमितहरूका लागि होम आइसोलेशनमा बस्न प्रेरित गर्दै पोषण भत्तासमेत दिएका ।

टोखा नगरपालिकामा पोषण भत्ता

टोखा नगरपालिकाले संक्रमितहरूलाई होम आइसोलेसनमा बस्न प्रेरित गर्ने र पोषण भत्ता दिने गरेको छ । नगर उपप्रमुख ज्ञानमाया डङ्गोलका अनुसार गत भदौ ३ गतेको नगरकार्यपालिका बैठकले आइसोलेसन बनाउने निर्णय गरेअनुसार ३ दिनमा १७ बेडको आइसोलेशन सेन्टर तयार भयो । होम आइसोलेसनमा बस्न समस्या हुनेहरूले आइसोलेशन सेन्टरमा प्राथमिकता पाए ।

प्रमुख डङ्गोलले होम आइसोलनमा बसेकाहरूलाई पोषणयुक्त खानाका लागि प्रतिव्यक्ति ३५० रुपैयाँका दरले पोषण भत्ता वितरण गरिरहेको उनल बताइन् । उनले भनिन्, ‘कतिपय अवस्थामा हामी घरमै गएर रकम वितरण गरिरहेका छौँ, अहिलेसम्म ९० जनालाई पोषण भत्ता दिइसकेका छौँ ।’

हालसम्म टोखा नगरपालिकाभित्र ४ हजार ५ सय जनाको पीसीआर परीक्षण गरिएकोमा ८२५ जना कोरोना संक्रमितहरू फेला परेका छन् । टोखा नगरक्षेत्रभित्र ३ जनाको मृत्यु भएको छ ।

कीर्तिपुरमा क्वारेन्टिन नै आइसोलेशन

कीर्तिपुर नगरपालिकाले जनस्वास्थ्य केन्द्रीय कार्यालयमा रहेको २ सय बेडको क्वारेन्टिनलाई आइसोलेशन बनाएको छ । नगर प्रमुख रमेश महर्जनका अनुसार त्रिभुवन विश्वविद्यालयको रिसर्च सेन्टरमा पनि २ सय बेडकै आइसोलेसन बनाइएको छ ।

उनले पीसीआरको दायरा फराकिलो पार्दै नगरमै पीसीआर ल्याब सञ्चालन गर्ने तयारी गरेको बताए ।

कीर्तिपुर नगरपालिकाभित्र ६५ जनामा कोरोना सक्रमण देखिएको छ । जसमध्ये ३२ जना महिला र ३३ जना पुरुष छन् । नगरको होम आइसोलेशनमा ६० र अस्पतालमा ५ जना रहेको महर्जनले बताए । होमआइसोलेशनमा रहेका कोभिड संक्रमितहरूलाई स्वास्थ्यकर्मीले निगरानी गरिरहेको उनले बताए ।