काठमाडौँ । जाजरकोटको भेरी नगरपालिकामा अविरल वर्षाका कारण गएको पहिरोले घर र टहरा बगाउँदा १० जना घाइते भएका छन् भने अन्य तीन जना सम्पर्कविहीन भएका छन्। शुक्रबार दिउँसो करिब चार बजेदेखि लगातार परेको वर्षाका कारण भेरी नगरपालिका–२ रिसाङसहितका क्षेत्रमा ठूलो क्षति पुगेको हो। घटनालगत्तै प्रभावित क्षेत्रमा नेपाली सेना, नेपाल प्रहरी र सशस्त्र प्रहरी बलबाट सुरक्षाकर्मीको टोली परिचालन गरी खोजी तथा उद्धार कार्य तीव्र पारिएको छ।
पहिरोमा परी गम्भीर घाइते भएका रामबहादुर शाही, भद्राकली कार्की र केदार कार्कीलाई जिल्ला अस्पतालमा प्राथमिक उपचारपश्चात् थप उपचारका लागि नेपालगञ्ज तथा सुर्खेत रिफर गरिएको छ। अन्य घाइतेहरूमा सिद्धिबहादुर कामी, अनिता कार्की, युनिश शाही, सुन्तली चदरा, मनवीर चदरा, मनिषा विक र मोतीकला विक रहेका छन्, जसको विभिन्न स्वास्थ्य संस्थामा उपचार भइरहेको छ। पहिरोबाट जोगिन भागदौड गर्ने क्रममा ५४ वर्षीय उमासिंह खत्री, ७० वर्षीय भीमबहादुर कार्की र ८७ वर्षीया रती खत्री बेपत्ता भएको प्रहरीले जनाएको छ।
यस प्राकृतिक विपद्का कारण पूर्णबहादुर विकको दुईतले कच्ची घर पूर्ण रूपमा ध्वस्त भएको छ भने भैरवी केसीका दुईवटा अस्थायी टहराहरूमा समेत क्षति पुगेको छ। वर्तमान अवस्थामा खटिएको सुरक्षा टोलीले बेपत्ता भएकाहरूको खोजी कार्यलाई व्यापक बनाउनुका साथै घटनास्थलमा भएको कुल क्षतिको यकिन विवरण संकलन गर्ने काम गरिरहेको छ।