काठमाडौं– युक्रेनमा आफ्ना सबै लक्ष्य पूरा गरिछाड्ने रुसी राष्ट्रपति भ्लादिमिर पुटिनले जनाएका छन् ।
राजधानी मस्कोबाट ५ हजार ५ सय किलोमिटर पूर्वमा रहेको भोस्तोच्नी कोस्मोड्रोम नामक अन्तरिक्ष केन्द्रमा आयोजित पत्रकार सम्मेलनमा बोल्दै पुटिनले युक्रेनमा रुसले सबै उद्देश्य पूरा गरिछाड्ने अडान व्यक्त गरेका हुन् ।
कोस्मोड्रोमका कामदारले युक्रेनमा जारी ‘सैनिक कारवाही’ बाट लक्ष्य पूरा हुन्छ वा हुँदैन भनी सोधेको प्रश्नको जवाफ दिँदै पुटिनले भने, ‘अवश्य पनि, यसमा मलाई कुनै शंकै छैन ।’
आफ्ना सैनिक युक्रेनी राजधानी किभ आसपासका क्षेत्रबाट पछि हटेयता पहिलो पटक युद्धबारे पुटिनको यस्तो टिप्पणी आएको हो । त्यस्तै, उनले युक्रेनसँगको शान्ति वार्ताको बाटो बन्द भएको टिप्पणी गरेका छन् ।
समाचार संस्था रोयटर्सका अनुसार रुसी युद्ध अपराधको ‘झूटो दाबी गरेर’ र पूरै युक्रेनमा लागू हुने गरी सुरक्षा प्रत्याभूति खोजेर युक्रेन आफैँले शान्ति वार्तामा गतिरोध उत्पन्न गराएको समेत आरोप लगाए ।
‘हामी फेरि हाम्रा लागि बाटो बन्द भएको अवस्थामा फर्केका छौँ ।’ पुटिनलाई उद्धृत गर्दै रोयटर्सले जनाएको छ ।