पाकिस्तानी ब्याटर सउद शकील बने प्रथम श्रेणी क्रिकेटमा टाइम आउट हुने सातौं खेलाडी

पाकिस्तानका ब्याटर सउद शकील प्रथम श्रेणी क्रिकेटमा टाइम आउट हुने सातौं खेलाडी बनेका छन् । यस्तै शकील पाकिस्तान क्रिकेट इतिहासमा टाइम आउट हुने पहिलो खेलाडी बनेका छन् ।

पाकिस्तानको प्रथम श्रेणी घरेलु प्रतियोगिता ‘प्रेसिडेन्ट ट्रफी’ क्रिकेटको फाइनलको दोस्रो दिन स्टेट बैंक अफ पाकिस्तानका टोलीका खेलाडी शकील पाँचौं नम्बरमा ब्याटिङ गर्न जानुपर्ने थियो । तर टोलीले २ बलमा २ विकेट गुमाएपछि शकील तयार थिएनन् । उनी ब्याटिङ गर्न क्रिजमा पुगेपछि पीटीभीका कप्तान बटले अपील गरेपछि अम्पायरले ३ मिनेटभित्र तयार नभएका कारण शकीललाई टाइम आउट दिए ।

टाइम आउटको पछिल्लो घटना सन् २०२३ को एकदिवसीय विश्वकप क्रिकेटमा भएको थियो । बङ्गलादेशसँगको खेलमा श्रीलङ्काका एन्जेलो म्याथ्युज अन्तर्राष्ट्रिय क्रिकेटमा टाइम आउट हुने पहिलो खेलाडी बनेका थिए ।