साउदी अरबमा हुथी आक्रमणपछि मध्यपूर्वमा नयाँ तनाव: राष्ट्रसङ्घद्वारा संयमताको आग्रह, इयुद्वारा प्रतिबन्धको तयारी

काठमाडौँ । यमनका हुथी विद्रोही समूहले छिमेकी साउदी अरबमाथि निरन्तर ड्रोन र क्षेप्यास्त्र आक्रमण गरेपछि मध्यपूर्व क्षेत्रमा फेरि ठूलो सुरक्षा तनाव सिर्जना भएको छ । संयुक्त राष्ट्रसङ्घका महासचिव एन्टोनियो गुटेरेसले नागरिक संरचना लक्षित यस्ता आक्रमणहरूको कडा विरोध गर्दै द्वन्द्वरत पक्षहरूलाई युद्ध रोकेर कूटनीतिक संवादमा फर्कन आह्वान गरेका छन् ।

महासचिव गुटेरेसले निर्दोष सर्वसाधारणलाई निशाना बनाइनु अन्तर्राष्ट्रिय मानवीय मान्यताविपरीत भएको बताउँदै यस्ता कदमले क्षेत्रीय स्थायित्वमा दीर्घकालीन क्षति पुर्‍याउने चेतावनी दिएका छन् । यमनमा वर्षौँदेखि जारी गृहयुद्ध र मानवीय संकट अन्त्यका लागि राजनीतिक समझदारी बाहेक अर्को कुनै विकल्प नभएको राष्ट्रसङ्घको ठहर छ ।

यसै सन्दर्भमा युरोपेली संसद्‌ले हुथी आन्दोलनलाई ‘आतङ्कवादी संगठन’ घोषणा गर्न र उनीहरूको सम्पूर्ण वित्तीय स्रोत, बैंकिङ सम्पत्ति तथा आर्थिक सहायता रोक्का गर्न युरोपेली युनियनलाई औपचारिक सिफारिस गरेको छ । लाल सागर तथा अन्तर्राष्ट्रिय जलमार्गमा पारवहन सुरक्षामा अवरोध पुर्‍याइएको र ड्रोन आक्रमण गरिएको भन्दै संसद्ले कडा आपत्ति जनाएको हो ।

यता इराक सरकारले साउदी अरबमा भएको आक्रमणप्रति आपत्ति जनाउँदै आफ्नो भूमि कुनै पनि बाह्य आक्रमणका लागि प्रयोग हुन नदिने प्रस्ट पारेको छ । इराक र साउदी अरबका विदेशमन्त्रीबीच भएको टेलिफोन कुराकानीमा मध्यपूर्वमा तनाव घटाउन संयुक्त कूटनीतिक प्रयास जारी राख्ने सहमति भएको जनाइएको छ ।