काठमाडौं- नेपाली राष्ट्रिय फुटबल टोलीका मुख्य प्रशिक्षक अब्दुल्लाह अल्मुताइरीले मरिससविरुद्धको मैत्रीपूर्ण खेलमा जित हात पारे त्यसको श्रेय खेलाडीलाई जाने बताएका छन्।
नेपाल र मरिससबीच शनिबार र मंगलबार दुई मैत्रीपूर्ण खेल हुँदैछ। खेल दिउँसो ४:४५ बजे सुरु हुने अखिल नेपाल फुटबल संघ (एन्फा)ले जनाएको छ। त्यसका लागि मरिससको टोली सोमबार काठमाडौं आइसकेको छ।
उक्त खेलका लागि अल्मुताइरीले पनि ३२ सदस्यीय दुई टोलीको घोषणा गरिसकेका छन्। उनले मैत्रीपूर्ण खेल अघि सधैंझै जित हात पारे त्यसको सम्पूर्ण श्रेय खेलाडीहरुमा जाने बताएका छन्।
साथै पराजय भोगे त्यसको जिम्मेवार आफूमात्र हुने समेत दोहर्याएका छन्।
‘सधैंझै हरेक खेलमा जित हात पारे खेलाडीहरु प्रशंसाको हकदार हुनेछन्। हारे त्यसको दोष केवल ममाथि मात्रै हुनेछ। हाम्रो उदेश्य भनेको खेलाडीहरुमाथि कुनै प्रकारको क्रुरता नदेखाइयोस्,’ अल्मुताइरीले सामाजिक सञ्जालमा लेखेका छन्।
बुधबार पनि टोलीको घोषणा गर्दै अल्मुताइरीले मरिससविरूद्वको दुई मैत्रीपूर्ण खेलमा नतिजाभन्दा पनि राम्रो प्रदर्शनको अपेक्षा राखेको बताएका थिए।
उनले भनेका थिए, ‘खेलाडीलाई भविष्यमा अन्तर्राष्ट्रिय खेलका लागि तयार गर्नु छ। यो खेलाडीमा अन्तर्राष्ट्रिय खेलको अनुभव थप्ने अवसर पनि हो। त्यसैले म खेलाडीले अन्तर्राष्ट्रिय खेलको अनुभव बोकेको हेर्न चाहन्छु। नतिजाभन्दा पनि राम्रो प्रदर्शनको अपेक्षा गरिरहेको छु।’
प्रशिक्षक अल्मुताइरीले प्रारम्भिक छनोटमा समावेश गरेका ३४ खेलाडीलाई नै मरिससविरूद्वको दुई खेलका लागि प्रयोग गर्ने छन्।
उनले जारी सहिद स्मारक ए डिभिजन लिगमा गरेको प्रदर्शनलाई आधार मान्दै गोलरक्षकद्वय टिकेन्द्र थापा र शत्रुघन चौधरी, डिफेन्डर नविन गुरुङ, मिडफिल्डर आकाशबुढा मगर, कृतिश रत्न छुन्जु, सुदीप गुरुङ तथा फरवार्ड सुशील राईलाई पहिलो पटक टोलीमा छनोट गरेका थिए।
यस्तै, आशिष राई, विमल घर्ती मगर, प्रशान्त अवस्थी र जगजित श्रेष्ठ पनि टोलीमा समेटिएका छन्। अन्तिम समयमा प्रशान्तले प्रारम्भिक टोलीमा स्थान बनाएका थिए।
यद्यपि, आयुष घलान, कमल थापा र दीनेश हेन्जन भने सुरुवाती टोलीमा परेपनि चोटका कारण बाहिरिएका छन्।