युक्रेन-अमेरिका खनिज सम्झौतामा सहमति, तर सुरक्षा ग्यारेन्टी दिएन

काठमाडौं । युक्रेन र अमेरिका खनिज सम्झौताका सर्तहरूमा सहमत भएका छन् । युक्रेनको राजधानी किभका एक वरिष्ठ अधिकारीका अनुसार सम्झौतामा महत्वपूर्ण संशोधन गरिएको छ, तर विस्तृत विवरण खुलाइएको छैन ।

मिडियाहरूका अनुसार अमेरिकाले युक्रेनको खनिज पदार्थ प्रयोगबाट ५०० अर्ब डलर कमाउने प्रारम्भिक सर्त हटाएको छ । तर, अमेरिकाले युक्रेनलाई सुरक्षा ग्यारेन्टी भने दिएको छैन, जुन युक्रेनको मुख्य माग थियो ।

अमेरिकी राष्ट्रपति डोनाल्ड ट्रम्पले युक्रेनी राष्ट्रपति भ्लोदिमिर जेलेन्स्की सम्झौतामा हस्ताक्षर गर्न वाशिंगटन आउन सक्ने बताएका छन् । युक्रेनमा दुर्लभ खनिज पदार्थको ठूलो भण्डार छ, जसका केही भाग रूसको नियन्त्रणमा छन् ।

ट्रम्पले युक्रेनको दुर्लभ खनिजमा अमेरिकी पहुँच आवश्यक रहेको बताएका छन्, किनभने चीन हाल विश्वव्यापी आपूर्तिमा हावी छ । अमेरिकी प्रशासनले यसलाई युक्रेन-रुस युद्धविरामको पहिलो कदमका रूपमा हेरिरहेको छ ।