आध्यात्मिक अयोध्या : ‘हनुमानका सेना’समेत हर्षित

जनवरी २२ मा राम जन्मभूमि अयोध्यामा भव्य उत्सव थियो । भारतीय प्रधानमन्त्री नरेन्द्र मोदीले राम मन्दिरको प्राण प्रतिष्ठा तथा उद्घाटन गरेर विश्वभरका हिन्दुहरूको ध्यान केन्द्रित गरे । सम्भवतः इतिहासमा कुनै मन्दिरको यति तामझामका साथ भव्य उद्घाटन भएको यो नै पहिलो घटना थियो ।

नेपालबाट पनि हामी केही पत्रकारहरू ‘पर्यवेक्षक’ का रुपमा अयोध्या पुग्यौं ।

लाखौं भक्तजनलाई साक्षी राखेर भारतीय प्रधानमन्त्री मोदीले राम मन्दिरको उद्घाटन गरे । उनले मन्दिरमा पूजा गरेर आफ्नो ११ दिने व्रत तोडे ।

एघार दिनसम्म मोदीले खाना नखाई नरिवलको पानी मात्र पिएको भारतीय सञ्चार माध्यमको दाबी थियो ।