शिक्षामन्त्री पुन भन्छन् : गतिलो र सिर्जनशील टिम बनाउन व्यस्त छु, केही दिन फोन नगर्नुहोला

काठमाडौं । शिक्षा, विज्ञान तथा प्रविधिमन्त्री महावीर पुनले मन्त्रालयमा एउटा गतिलो र सिर्जनशील टिम बनाउन लागेको बताएका छन् ।

आफू व्यस्त रहेकोले केही दिन अनावश्यक फोन र मेसेज नगर्न समेत उनले अनुरोध गरेका छन्।

मन्त्री पुनले बुधबार बिहान सामाजिक सञ्जालमार्फत अहिले आफू मन्त्रालयमा सिर्जनशील टिम बनाउन व्यस्त रहेको जानकारी गराउँदै फोन र मेसेज नगर्न आग्रह गरेका हुन्।

उनले लेखेका छन्, ‘अनुरोध– अस्तिदेखि मोबाइलमा, मेसेन्जरमा र ह्वाट्सएपमा हजारौँ कल र मेसेज आइरहेका छन्। म मन्त्रालयमा एउटा गतिलो र सिर्जनशील टिम बनाउन व्यस्त छु। त्यसैले केही दिनका लागि अनावश्यक फोन नगर्न र मेसेज नपठाउनुहोला।’

यही असोज ६ गते शिक्षामन्त्रीमा नियुक्त पुनले त्यही दिन विज्ञान तथा प्रविधि क्षेत्रसँग सम्बन्धित चारवटा सल्लाहकार समिति गठन गर्ने निर्णय गरेका थिए।

मन्त्रालयका अनुसार उनले अन्तरिक्ष प्रविधि, न्युक्लियर टेक्नोलोजी, बायोटेक्नोलोजी र सूचना प्रविधि तथा एआईसम्बन्धी सल्लाह दिन सल्लाहकार समिति गठन गर्ने निर्णय गरेका हुन्।

शिक्षामन्त्री पुनले मंगलबार मात्र समय खेर नजाओस् भनेर केशरमहलस्थित शिक्षा मन्त्रालयमै खाने, बस्ने व्यवस्था मिलाएका छन्।