श्रीलङ्कामा ‘अर्णव’ चक्रवातको प्रभाव : मुसलधारे वर्षापछि देशभरका विद्यालय बन्द, माछा मार्न प्रतिबन्ध

काठमाडौँ । बङ्गालको खाडीमा विकसित शक्तिशाली ‘अर्णव’ (Arnab) चक्रवातका कारण श्रीलङ्कामा तीव्र गतिको हावाहुरीसहित मुसलधारे वर्षा सुरु भएपछि त्यहाँको जनजीवन नराम्ररी प्रभावित भएको छ । विपद्को बढ्दो जोखिमलाई ध्यानमा राख्दै श्रीलङ्का सरकारले देशभरका सम्पूर्ण विद्यालयहरू बन्द गर्ने निर्णय गरेको छ ।

समुद्री क्षेत्रमा चार मिटरसम्म अग्ला खतरनाक छालहरू आउन सक्ने चेतावनी दिँदै श्रीलङ्काली अधिकारीहरूले तटीय क्षेत्रमा माछा मार्ने कार्यमा पूर्ण रूपमा प्रतिबन्ध लगाएका छन् । शिक्षा मन्त्रालयले विद्यार्थी तथा शिक्षक-कर्मचारीको सुरक्षालाई उच्च प्राथमिकतामा राख्दै आकस्मिक बिदा दिइएको जनाएको छ । यद्यपि पूर्व निर्धारित सामान्य शिक्षा प्रमाणपत्र तहको परीक्षा भने यथावत सञ्चालन हुने बताइएको छ ।

भारतीय मौसम विज्ञान विभाग (आईएमडी) का अनुसार ‘अर्णव’ चक्रवात हाल पश्चिम-उत्तर-पश्चिम दिशातर्फ १७ किलोमिटर प्रतिघण्टाको गतिमा तीव्र रूपमा अगाडि बढिरहेको छ । यो शक्तिशाली आँधी बुधबार बिहान भारतको विशाखापट्टनम र बापटलाको तटीय क्षेत्रमा जमिनसँग ठोक्किने (ल्याण्डफल हुने) प्रक्षेपण गरिएको छ ।

अत्यन्त विनाशकारी मानिएको यस चक्रवातको केन्द्र वरिपरि हावाको गति २१५ देखि २२० किलोमिटर प्रतिघण्टासम्म पुगेको छ । जमिनमा ठोक्किने बेलामा यसको गति करिब १३५ किलोमिटर प्रतिघण्टा रहने पूर्वानुमान छ । चक्रवातको सम्भावित विध्वंसलाई ध्यानमा राखेर भारतको आन्ध्र प्रदेश र काकिनाडा क्षेत्रबाट मात्रै करिब ८९ हजार नागरिकलाई सुरक्षित आश्रयस्थलमा सारिएको छ भने ५० भन्दा बढी रेल सेवा र दर्जनौँ हवाई उडानहरू रद्द गरिएका छन् ।

चक्रवातको प्रभावले श्रीलङ्का र भारतका विभिन्न भू-भागका साथै बङ्गालको खाडीनजिक रहेका दक्षिण एसियाली देशहरू नेपाल र बंगलादेशमा समेत वर्षा र मौसम बदलीको असर देखिन थालेको मौसमविद्हरूले बताएका छन् ।