काठमाडौँ । छिमेकी मुलुक भारतको दुई दिने औपचारिक भ्रमणको सिलसिलामा नयाँ दिल्ली पुगेका प्रधानमन्त्री बालेन शाह र भारतीय विदेशमन्त्री डा. एस जयशंकरबिच आइतबार साँझ शिष्टाचार भेटवार्ता सुरु भएको छ। नयाँ दिल्लीस्थित प्रतिष्ठित होटल ताजमा भएको उक्त भेटमा दुई देशबिचको आपसी सम्बन्ध, सहकार्य तथा द्विपक्षीय साझेदारीका विषयमा छलफल भइरहेको छ।
विदेशमन्त्री जयशंकरले प्रधानमन्त्री शाहको सम्मानमा शिष्टाचार भेट गर्दै भारत आगमनमा हार्दिक स्वागत गरेका थिए। भेटवार्ताका क्रममा नेपाल र भारतबिचको बहुआयामिक सम्बन्धलाई समयसापेक्ष बनाउँदै विकास साझेदारी, आर्थिक सहयोग र सीमाक्षेत्रको सहकार्यलाई अझ मजबुत तुल्याउने विषयमा विचारविमर्श भएको बताइएको छ।
प्रधानमन्त्री शाहको यस भ्रमणलाई दुई देशबिचको सम्बन्धमा नयाँ आयाम थप्ने महत्त्वपूर्ण अवसरका रूपमा हेरिएको छ। कार्यतालिका बमोजिम विदेशमन्त्रीसँगको संवादपछि भारतीय समकक्षी तथा अन्य शीर्ष राजनीतिक नेतृत्वसँग पनि महत्त्वपूर्ण द्विपक्षीय छलफलहरू सञ्चालन हुने कार्यक्रम रहेको छ।
नेपाली प्रतिनिधिमण्डलका अनुसार भ्रमणका क्रममा व्यापार प्रवर्द्धन, कनेक्टिभिटी पूर्वाधार, ऊर्जा व्यापार तथा दुईपक्षीय सम्झौताहरूको समीक्षा लगायतका मुख्य एजेन्डामा प्राथमिकताका साथ छलफल अघि बढ्नेछ। यस उच्चस्तरीय भ्रमणले दुवै राष्ट्रका जनताबीचको सदियौँ पुरानो सांस्कृतिक तथा आर्थिक सम्बन्धलाई अझ प्रगाढ बनाउने अपेक्षा गरिएको छ।


