कांग्रेसमा विभाग गठन र मनोनयनको काम तत्काल रोक्न पौडेल पक्षको माग

काठमाडौं – नेपाली कांग्रेसको इतर पक्षले हालै पार्टीका विभाग गठन र मनोनयनहरू भएकोमा आपत्ति जनाएको छ ।

वरिष्ठ नेता रामचन्द्र पौडेल, महामन्त्री शशांक कोइराला र कोषाध्यक्ष सीतादेवी यादवले विधान र निर्वाचन आचार संहिता विपरीत सभापति शेरबहादुर देउवाले विभाग गठन र मनोनयन गरिरहेको आरोप लगाउँदै आपत्ति जनाएका हुन् ।

उनीहरूले सभापति देउवा र निर्वाचन समितिको ध्यानकर्षण गराउँदै विभाग गठन र मनोनयनको काम तत्काल रोक्न माग गरेका छन् ।

आगामी फागुनका लागि निर्धारण भएको चौधौँ महाविधेशन प्रभावित पार्ने गरी मनोनयन गरेको उनीहरूको आरोप छ । तीनै जना नेताले संयुक्त हस्ताक्षर गरेर पार्टीको निर्वाचन समितिलाई विरोधपत्र बुझाएका छन् ।

पत्रमा भनिएको छ, ‘विधि पद्धति मिचेर हाल गठन भएका र भइरहेका उक्त विभागहरू अस्वीकार्य रहेको जानकारी गराउँदै आसन्न महाधिवेशनको स्वच्छता एवं निष्पक्षतालाई ध्यानमा राख्दै यस्तो विधान एवं विभिन्न अचार संहिता विपरीतका मनोनयन र नियुक्तिहरू स्वीकार नगर्न पार्टीका सम्पूर्ण तहका नेता, कार्यकर्ता एवं शुभेच्छुक साथीहरूलाई आह्वान गर्दछौँ ।’