मौसम: देशको विभिन्न ठाउँमा सामान्य वर्षा हुने

काठमाडौं – मनसुनी वायु सक्रिय रहँदा आज पनि मुलुकका विभिन्न स्थानमा सामान्य वर्षा भइरहेको छ ।

बागमती प्रदेश, गण्डकी प्रदेश, प्रदेश १, प्रदेश ५, कर्णाली प्रदेश र सुदूरपश्चिम प्रदेशका थोरै स्थानमा अहिले हल्का वर्षा भईरहेको मौसम पूर्वानुमान महाशाखाले जनाएको छ ।

मनसुनी न्युनचापीय रेखा नेपालको तराई भूभागबाट केही दक्षिणतिर सरेकाले दिउँसो केही ठाउँमा हल्कादेखि मध्यम वर्षाको सम्भावना रहेको छ । यस्तै प्रदेश ५ र सुदूरपश्चिम प्रदेशका एक दुई स्थानमा भने भारी वर्षाको सम्भावना रहेको छ ।

आज राति प्रदेश १, गण्डकी प्रदेश, कर्णाली प्रदेश र सुदूरपश्चिम प्रदेशका एक दुई स्थानमा भारी वर्षाको सम्भावना रहेकाले सतर्क रहन पनि आह्वान गरिएको छ ।

लमजुङको खुदीबजार र बेँशीसहर क्षेत्रमा भने भारो वर्षा भएकाले सो क्षेत्र आसपास भएर बहने साना खोलामा समेत आकस्मिक बहाब तथा भिरालो ठाउँमा पहिरोको जोखिम रहेकाले सतर्क रहने जल तथा मौसम विज्ञान विभागले अनुरोध गरेको छ ।