March 2, 2024, Saturday
२०८० फाल्गुन १९, शनिबार
KN hd tv

‘पुजार सार्की’ मा आर्यन, प्रदीप र पलको पारिश्रमिक कति ?

काठमाडौँ– मल्टिस्टार फिल्म ‘पुजार सार्की’को कास्कीको कास्कीकोटमा छायांकन थालेको आइतबार छैटौँ दिन पुगेको छ । आर्यन सिग्देल, प्रदीप खड्का र पल शाह एक साथ देखिने भएकाले फिल्मको चर्चा चुलिँदो छ ।

सन् २०२४ मै प्रदर्शनमा आउने बुझिएको यो फिल्म सम्भवतः वर्षको बहुप्रतिक्षित फिल्म हुनेछ । अहिलेका ‘डिमान्डेड’ नायक प्रदीपलाई फरक भूमिकामा हेर्न दर्शक प्रतीक्षारत छन् । कुनै समय सबैभन्दा बढी पारिश्रमिक बुझ्ने ‘लभर बोइ’ आर्यनका कारण पनि फिल्मले चर्चा बटुल्न सहयोग गरेको छ ।

फिल्ममा प्रदीपको ‘स्किन टाइम’ आर्यन र पलको भन्दा केही बढी भएको बुझिएको छ । यद्यपि तीनै नायक मुख्य भूमिकामा रहेको र ‘स्किन टाइम’मा २० को १९ मात्रै फरक भएको निर्माण पक्षले स्पष्ट पारेको छ ।

निर्माण पक्ष करिब तीन करोड लागतमा फिल्म पूरा गर्ने उद्देश्यले छायांकनमा निस्किएको छ । तीन डिमान्डेड नायकको कति पारिश्रमिकमा निर्माण पक्षले कति खर्च ग¥यो ? यो पनि चर्चाको विषय बनेको छ ।

स्रोतले खबरहबलाई दिएको जानकारीअनुसार पलले यो फिल्मबाट २० लाख पारिश्रमिकमा सम्झौता गरेका हुन् । त्यस्तै, आर्यनले आफ्नो चल्तीको रेट १५ लाख पारिश्रमिक लिने सहमति भएको छ । घनिष्ट मित्र निर्देशक दिनेश राउतको फिल्म भएकाले उनले पारिश्रमिक बार्गेनिङ नगरेको स्रोत बताउँछ ।

त्यस्तै, प्रदीपको रेट बजारमा ५० लाख भए पनि यस फिल्ममा उनी ३० लाखमा अनुबन्ध भएको स्रोत स्पष्ट छ । स्रोत थप्छ, ‘५० लाख दिने भनेको चलचित्रमा पनि प्रदीपले कथा मन नपरेर अस्वीकार गर्ने गरेका छन् । तर यस फिल्मको कथाले उनी पारिश्रमिकमा लचक देखाएको हुन सक्छ ।’

लेखक विकास सुवेदी र निर्देशक राउतसँग चलचित्र ‘प्रकाश’को टिम भएकाले पनि प्रदीपले पारिश्रमिकमा जोड नगरेको हुन सक्ने स्रोत बताउँछ । ‘प्रकाश’ प्रदीपको अभिनय क्षमतालाई प्रमाणित गर्न सहयोग गरेको फिल्म हो ।

शीर्ष समाचार

धेरै पढिएको