November 27, 2022, Sunday
२०७९ मंसिर ११, आईतवार
KN hd tv

विवादकै बीच देउवाको गृह जिल्ला डडेल्धुरामा वडा अधिवेशन, स्थगित गर्न पौडेलको माग

काठमाडौं- क्रियाशील सदस्यता विवादकै बीच प्रधानमन्त्री समेत रहेका नेपाली कांग्रेस सभापति शेरबहादुर देउवाको गृह जिल्ला डडेल्धुरामा आज (शुक्रबार) बाट वडा अधिवेशन हुँदैछ । कांग्रेसको १४ औं महाधिवेशन अन्तर्गत डडेल्धुरा जिल्लाका सात पालिकाका ५२ वडामा अधिवेशन हुन लागेको हो ।

महाधिवेशनको कार्यतालिका अनुसार १८ भदौमा हुनुपर्ने वडा अधिवेशन क्रियाशील सदस्यता विवादका कारण ढिलो भएको हो । डडेल्धुरामा क्रियाशील सदस्यता विवादका कारण जिल्ला सभापति कर्णबहादुर मल्लले अधिवेशन स्थगनको सूचना जारी गरेका थिए । तर निर्वाचन अधिकृत लोकेन्द्रबहादुर बमले बिहीबार साँझ विज्ञप्ति जारी गर्दै २५ भदौमै अधिवेशन हुने जनाएका थिए ।

कांग्रेस जिल्ला कार्यसमितिले करिव ५ हजार आठ सयको क्रियाशील सदस्यता सूची पठाएकोमा केन्द्रले पाँच सय जनाको नाम हटाएको र तीन सयको नाम थप गरेको आरोप जिल्ला सभापति मल्लको छ । तर अर्काे पक्षले भने समायोजनबाट आएका क्रियाशील सदस्यता सूची जिल्लाले इन्ट्री नगरेका कारण केन्द्रबाट थपिएको र जिल्लाले एकपक्षीय रुपमा क्रियाशील सदस्यता पठाएको दावी गरेको छ ।

स्थगित गर्न देउवालाई पौडेल र निधिको आग्रह
डडेल्धुरा जिल्लाको वडा अधिवेशन स्थगन गर्न माग गर्दै कांग्रेस वरिष्ठ नेता रामचन्द्र पौडेलसहितका नेताहरुले बिहीबार सभापति देउवासँग माग गरेका थिए । कांग्रेस उपसभापति विमलेन्द्र निधिले पनि देउवालाई पत्र लेख्दै वडा अधिवेशन स्थगन गर्न माग गरेका थिए । वरिष्ठ नेता रामचन्द्र पौडेलले सभापति शेरबहादुर देउवालाई पार्टीको जारी अधिवेशन धाँधलीरहित र निष्पक्ष बनाउन आग्रह गरेका छन् ।

डडेल्धुरामा जिल्ला कार्यसमितिको निर्णय बेवास्ता गर्दै गाउँपालिका -नगरपालिका वडा अधिवेशन सुरु भएपछि नेता पौडेलले शुक्रबार बिहान सभापति देउवासँग भेटवार्ता गरेका हुन् । प्रधानमन्त्री समेत रहेका सभापति देउवालाई भेटेर पार्टी निर्वाचनलाई धाँधलीरहित र निष्पक्ष बनाउन आग्रह गरेको पौडेलले बताएका छन् । प्रधानमन्त्रीको सरकारी निवास बालुवाटारमा भएको छलफलमा पौडेलसँगै महामन्त्री डा. शशांक कोइराला, नेताहरु प्रकाशमान सिंह, अर्जुननरसिंह केसी, डा. मीनेन्द्र रिजाल र जीवन परियारलगायत सहभागी थिए ।

कांग्रेसको करिव २० जिल्लाको क्रियाशील सदस्यता टुंगो नलाग्दा स्थानीय तहको अधिवेशन कार्यतालिका प्रभावित हुने आशका बढेको छ । प्रदेश दुईका आठ वटै जिल्ला, काठमाडौं, सिन्धुपाल्चोक, रसुवा, कपिलबस्तु, बाँके, बर्दिया, मोरङ, कैलालीलगायत जिल्लाको क्रियाशील सदस्यता नामावली सार्वजनिक गरिएको छैन । क्रियाशील सदस्यताकै विवादका कारण कांग्रेसको केन्द्रीय निर्वाचन समिति संयोजक महादेव यादवले पदबाट राजीनामा दिएका छन् ।

शीर्ष समाचार

धेरै पढिएको