September 18, 2021, Saturday
२०७८ आश्विन २, शनिबार
KN hd tv

टोकियो ओलम्पिक : दोस्रो दिन एसियाली राष्ट्रको प्रभाव

काठमाडौँ– टोकियोमा जारी गृष्मकालीन ओलम्पिक खेलकुदको दोस्रो दिन एसियाली देशहरूको प्रभाव देखिएको छ । चीनले एकै दिन तीन स्वर्ण पदक जितेको छ । पहिलो दिन सुटिङ, साइक्लिङ, जुडो, तेक्वान्दो, फेन्सिङ, आर्चरी र भारोत्तोलनको पदक टुङ्गो लागेको हो ।

सुटिङको महिला १० मिटर एयर राइफलमा चीनकी याङ क्वीनले स्वर्ण पदक जितिन् । रसियाली ओलम्पिक कमिटीकी अनास्टासिया गालासिनाले रजत तथा स्वीट्जरल्यान्डकी निना क्रिस्चियनले काश्य पदक जिते ।

सुटिङकै पुरुष १० मिटर एयर पिस्तोलमा इरानकी जावेद फोरुगीले स्वर्ण, सर्बियाका डामिर मिकेकले रजत र चीनका पेङ वीले काश्य पदक जिते ।

सुटिङमा ठूलो फड्को मार्ने अपेक्षा गरेको भारतीय टोलीले शुरूवातमै कमजोर प्रदर्शन गरेको छ । पेस्तोलमा स्वर्ण पदक जित्ने अनुमान गरिएका सौरभ चौधरी पदक जित्न असफल भए । राइफलमा पनि भारतीयहरू कमजोर देखिए ।

भारोत्तोलनको महिला ४९ किलो तौल समूहमा चीनकी झाउ झी झाउन पहिलो, भारतकी मिराबी छानु दोस्रो र इन्डोनेसियाकी विन्डी कान्टीका तेस्रो भए । भारोत्तोलनमा महिला स्पर्धामा बलियो शक्तिको रूपमा रहेको उत्तर कोरिया यस ओलम्पिकमा सहभागी भएन । यसबाट चीनलाई फाइदा पुग्ने अनुमान गरिएको छ ।

आर्चरीको मिक्स टिम इभेन्टमा दक्षिण कोरियाले स्वर्ण, नेदरल्यान्डले रजत र मेक्सिकोले काश्य पदक जिते । रोड साइक्लिङको पुरुष स्पर्धामा इक्वेडरका रिचार्ड कर्पाजले स्वर्ण, बेल्जियमका भान आर्ट आउटले रजत र स्लाभोनीयाका पोगाकर टाडेले काश्य पदक जिते ।

जुडोको महिला ४८ किलो तौल समूहमा कोसोभोकी कासानोकी डिस्ट्रयाले स्वर्ण, जापानकी तोनाकी फुनाले रजत जिते । मङ्गोलियाकी उरान्स्ट्राग खुन्खावात र युक्रेनकी विलोडिडा डारियाले काश्य पदक जिते ।

पुरुष ६० किलो तौल समूहमा जापानका ताकातो नोसिआले स्वर्ण र चाइनिज ताइपेइका याङ योङ योइले काश्य पदक जिते । फ्रान्सका लुका एमखेज्दे र काजकिस्तानका स्मेल्टोभ एल्डसले काश्य पदक जिते ।

फेन्सिङको महिला फाइनलमा चीनकी सुन एवेनले स्वर्ण पदक जितेकी छिन् । रोमानियाकी पोपेस्कुअन मारियाले रजत र इस्टोनियाका काट्रिना लेविसले काश्य पदक जिते ।

फेन्सिङको पुरुष साब्रेमा हङ्गेरीका आरोन सिलाजिलले स्वर्ण र इटालीका लुइगी सामेलले रजत पदक जिते । कोरियामा किम जुह्वानले काश्य पदक जिते ।

शनिवार नै भएको साइक्लिङको पुरुष रोड रेसमा इक्वेडरका रिचार्ड करबराजले स्वर्ण, बेल्जियमका भानअटए ओउटले रजत र स्लोभाकियाका टाडाइ पोजागरले काश्य पदक जिते ।

तेक्वान्दोको महिला ४९ किलो तौल समूहमा थाइल्यान्डकी पाटानिक पानीकाकले स्वर्ण, स्पेनकी आड्रियाना सेरेजोले रजत जिते । इजरायलकी अबिराग सेमरेग र सर्बियाकी टिजाना बोज्डानोभीकले काश्य पदक जिते ।

पुरुष ५८ किलो तौल समूहमा इटालीका डेलो भेट्रा क्वेलाले स्वर्ण र ट्युनिसियाका जेन्देओवी खालीलले रजत पदक जिते । रसियन ओलम्पिक कमिटीका मिखायल आर्टामोनोभ र कोरियाका जाङ जनले काश्य पदक जिते ।

ओलम्पिक खेलकुदको पहिलो ४९ वर्षको इतिहासमा पहिलो दिन अमेरिका पदकविहीन भएको छ । सन् १९७२ को म्युनिख ओलम्पिकमा अमेरिका पहिलो दिन पदकविहीन भएको थियो ।

पहिलो दिन पदकको टुङ्गो लागेका धेरै खेल अमेरिकाको प्राथमिकतामा परेका त थिएनन् परन्तु सुटिङको एयर राइफलमा पदक अपेक्षा गरेको थियो ।

पहिलो दिन पदक नजितेको १९७२ को ओलम्पिकमा अमेरिका समग्र तालिकामा सोभियत सङ्घभन्दा पछि दोस्रो स्थानमा रहेको थियो ।

शनिवार नै निर्धारित जापानी र चेक जोडीबीचको बिच भलिबलको खेल चेक खेलाडीमा कोरोना सङ्क्रमण देखिएपछि स्थगित भएको छ । चेकका स्लुभोका नाउसाचले कोभिडका कारण ओलम्पिक गुमाए ।

छैटौँ खेलाडीमा कोरोना सङ्क्रमण देखिएपछि चेक ओलम्पिक कमिटीले विज्ञप्ति जारी गर्दै अवस्था गम्भीर भएको जनाएको छ ।

यो ओलम्पिक खेलकुदमा जापानलाई केही धक्का लागेको छ । पौडीको ४०० मिटर मेड्लीमा स्वर्ण पदकका प्रबल दाबेदार मानिएका डिएगो सेटो पहिलो चरणबाटै बाहिरिएका छन् । सेटोले माइकल फ्लेप्सको नाममा रहेको विश्व कीर्तिमान भङ्ग गर्ने अनुमान गरिएको थियो ।

जापानलाई जिम्न्यास्टिकमा पनि धक्का लागेको छ । जापानले धेरै आशा गरेको चार पटकका ओलम्पियन कोइची ओचीमुरा हाई बारमा कला देखाउने क्रममा भुइँमा पछारिएका थिए । उनी आफ्नो प्रदर्शन सकिनै लाग्दा लडेपछि फाइनलमा प्रवेश गर्न असफल भए ।

यसअघि उनी ओलम्पिक र विश्व च्याम्पियनसिपमा सबैभन्दा छाएका पुरुष जिम्न्यास्टिक खेलाडी थिए । सन् २००९ देखि २०१६ सम्म विश्व च्याम्पियनसिप र ओलम्पिकमा उनको दबदबा रहेको थियो ।

लन्डनमा अलराउन्डमा स्वर्ण पदक जितेका उनले रियो ओलम्पिकमा पनि यसैमा सफलता पाएर ४४ वर्षपछि अलराउन्डको उपाधि रक्षा गर्ने पहिलो खेलाडीको रूपमा कीर्तिमान बनाएका थिए । उनले सन् २००८ को ओलम्पिकमा रजत पदक जितेका थिए ।

ओचिमिराले कुल ७ ओलम्पिक पदक जितेका छन् । ओलम्पिकमा तीन रजत र चार काश्य पदक जितेका उनले २१ विश्व च्याम्पियनसिप पदक जितेका छन् । एक ओलम्पिक साइकलमा भएका सबै अलराउन्ड स्पर्धामा स्वर्ण पदक जित्ने उनी जिम्न्यास्टिक इतिहासकै एक मात्र खेलाडी हुन् । उनको यो असफलतासँगै जिम्न्यास्टिकमा एउटा युगको अन्त्य भएको छ ।

शनिवार नेपालका दुई खेलाडीले प्रतिस्पर्धा गरेका थिए । सुटिङमा १० मिटर एयर राइफलमा कल्पना परियारले राष्ट्रिय कीर्तिमान भङ्ग गरिन् । जुडोमा भने सोनिया भट्ट पहिलो चरणमा रुस ओलम्पिक कमिटीकी एरिना डोल्गोभासँग पराजित भइन् । डोपिङमा परेका कारण रुसले ‘रुस ओलम्पिक कमिटी’ को नाममा सहभागिता जनाएको छ । –एजेन्सीहरूको सहयोगमा

शीर्ष समाचार

धेरै पढिएको