September 18, 2021, Saturday
२०७८ आश्विन २, शनिबार
KN hd tv

बाँकेमा भर्ना भएका थप पाँच सङ्क्रमितको मृत्यु

बाँके- बाँके अस्पतालमा भर्ना भएका थप पाँच सङ्क्रमितको उपचारको क्रममा मृत्यु भएको छ । कोरोनाको उपचार हुँदै आएको नेपालगञ्जस्थित भेरी अस्पतालमा तीन र शिक्षण अस्पताल कोहलपुरमा दुई जनाको मृत्यु भएको जिल्ला कोभिड सङ्कट व्यवस्थापन केन्द्रका स्रोत व्यक्ति तेज वलीले जानकारी दिए ।

उनका अनुसार, भेरी अस्पताल नेपालगञ्जमा कोरोना भाइरस सङ्क्रमणका कारण ५ महिने गर्भवतीको मृत्यु भएको छ । ठाकुरबाबा नगरपालिका–१ बर्दिया निवासी ३४ वर्षीया गर्भवतीको आज बिहान मृत्यु भएको हो । यसैगरी भेरी अस्पतालमै उपचाररत नेपालगञ्ज उपमहानगरपालिका–१९ निवासी ३९ वर्षीय पुरुष र बनागाड कुपिन्डे नगरपालिका–४ सल्यान निवासी ६० वर्षीया महिलाको मृत्यु भएको छ ।

बाँकेको कोहलपुरस्थित शिक्षण अस्पतालमा कोहलपुर नगरपालिका– ९ निवासी ६१ वर्षीय पुरुष र गुलरिया नगरपालिका–१० बर्दिया निवासी ६० वर्षीय पुरुषको मृत्यु भएको जिल्ला कोभिड सङ्कट व्यवस्थापन केन्द्रका स्रोत व्यक्ति वलीले जानकारी दिए । योसँगै बाँकेमा कोभिड सङ्क्रमणका कारण उपचारका लागि जिल्ला बाहिरबाट आएका १७५ र जिल्लाकै २२९ जनाले हालसम्म ज्यान गुमाइसकेका छन् ।

बाँकेमा कोरोनाको पहिलो लहरको तुलनामा दोस्रो लहरमा झण्डै तीन गुणा बढी मानिसको मृत्यु भएको छ । जिल्ला कोभिड–१९ संकट व्यवस्थापन केन्द्र बाँकेको तथ्यांक अनुसार (२०७७ साल वैशाख १९ गतेदेखि चैत मसान्तसम्म) कोरोनाको पहिलो लहरबाट बाँके जिल्लाका मात्रै ५८ जना संक्रमितको मृत्यु भएको उल्लेख छ । तर दोस्रो लहर सुरु भएको (२०७८ वैशाख १ गतेदेखि ३१ गतेसम्म) एक महिनाको अवधिमा १६७ जनाको मृत्यु भएको छ । जुन पहिलो लहरको तुलनामा मृत्यु हुने संक्रमितको संख्या झण्डै तीन गुणा हो ।

Single post fields

शीर्ष समाचार

धेरै पढिएको